「聖利」對決演入球Show

猪拉多纳

香港足總下年搞港職聯，大家當然對此好有期待， 點知足總再次令人失望，引述萬能鍾的金句「假大空」，我好熱愛香港足球，但有時真係好唔明點解足總唔可以搞好港足，唔通我哋仲等得唔夠耐咩？

轉吓話題講英超古仔，09年「聖人」修咸頓瀕臨破產，一個叫烈比希亞嘅富翁收購咗球會，仲幫手還清債務，同時請意大利銀行家高迪斯做球會主席。修咸頓當時身處英甲，更畀英足總扣咗10分。

形勢咁惡劣，高迪斯居然豪言要五年內升上英超。佢先請現時教緊紐卡素嘅柏杜做主帥，成功保住英甲席位，之後再請艾堅斯接手，10至11年度球季艾堅斯帶領「聖人」攞到英甲亞軍升上英冠；跟住個球季高迪斯亦履行誓言，只係用咗三季就將修咸頓帶返英超。
方法正確凡事皆可能

今季佢哋喺英超打得出色，全靠阿根廷籍領隊普捷天奴，將修咸頓改踢全場壓迫及短傳入滲。由英甲到有可能爭打歐洲賽資格，修咸頓靠高迪斯帶領下五年內做到。證明球壇內只要有正確方法，凡事皆可能，可惜係香港幾時先搵到啱嘅人呢？今個星期修咸頓主場對利物浦，我相信會係一場精彩嘅入球Show，不過高迪斯唔會喺現場，事關佢同球會意見分歧而離職，可能佢同我一樣喺屋企睇電視直播。

（now 621周日凌晨1時30分直播）