奧斯爾復出阿仙奴屠「城」

猪拉多纳

史篤城領隊曉士今季上任後，將隊波教到攻不強、守不穩，到目前為止27輪聯賽失咗42球，差3球就追到上季紀錄，今晚佢哋主場迎戰阿仙奴，撞啱「兵工廠」前鋒基奧特上場打破入球荒，奧斯爾又抖足搏殺，睇怕都係凶多吉少，阿仙奴讓半一，梗係捧1.81倍上盤啦！

（now622台周六晚11:00直播）
史篤城畀曉士累死

曉士季前接替家陣帶緊水晶宮嘅佩利斯，成為史軍新帥。新官上任大搞改革好正常，最弊曉士搞到隊波本來唔錯嘅防線，依家變成豆腐渣一樣，今季聯賽只得5場冇失波。自從2月初主場爆冷贏曼聯之後，史篤城已經3戰不勝排第15位，同降班區只有3分之隔，認真大鑊！最好笑係曉士話球員要自救，要學最近5戰僅失1球嘅韋斯咸咁喎，不過曉士嘅功力又點同艾拿戴斯比呀？

相反，阿仙奴喺歐聯失利後，上仗對護級球隊新特蘭即時大勝反彈，對拜仁踢到冇影，被球迷狂插嘅中場大腦奧斯爾，上星期抖完今晚復出搏殺，佢仲話自己已經準備好重新上路添，戰意咁強，上盤當然抵撐啦。