巴塞輪換殺手騷哥利

猪拉多纳

今晚西甲早場二哥巴塞作客華拉度列，「地上最強」嚟緊周中歐聯要硬撼曼城，今仗留力亦無可厚非，不過佢哋嘅輪換殺手柏度洛迪古斯力爭職業生涯第100個士哥，遇上曳到爆嘅華拉度列係時候騷下哥利，就算讓兩球照捧讓球客勝。

巴塞多名球星喺周中獲國家隊徵召，王牌美斯仲踢到嘔添，下周中又要應付歐聯16強次回合對曼城，雖然領先兩粒亦要小心應付，今輪只係對弱旅華拉度列，主帥馬天奴隨時畀班主力抖抖，等佢哋養精蓄銳火併曼城唔奇。好彩巴塞人才濟濟，例如青訓產品柏度洛迪古斯，撞正美斯、尼馬及阿歷斯山齊士冇傷冇病，大戰通常唔使預佢，不過佢好清楚自己喺主帥心目中嘅位置冇詐型，一有出場機會就搏甩髀。
華拉度列甩皮甩骨

柏度最識得把握機會show off自己，喺周中為西班牙出戰意大利，佢又再一次奠定勝局，近兩年先後攻破烏拉圭、法國及意大利3大世盃盟主嘅城池，不但取得於國家隊嘅第14球，夾埋巴塞(包括B隊)佢一共累積99粒，柏度為爭第100個士哥唔會hea踢。華拉度列近10場聯賽僅1勝，已經跌到落尾三，但佢哋搶分護級之際，上季頻有士哥嘅前鋒文路祖冇貨交，好衰唔衰喺2月放走中場核心艾拔，連進攻創造力都冇埋，點樣入波呀？依家巴塞追到只差一哥皇馬1分，梗係唔會對甩皮甩骨嘅華拉度列手下留情，炒3粒依絲執喇，斯維建議直取讓球客勝。
now 632周六晚11時直播