莫雷拉連場搏

猪拉多纳

　　個個雷神粉絲等到頸都長埋，千呼萬喚佢終於結束停賽期，呢次沙田出番嚟騎。喺佢停賽3期，潘頓贏咗4場頭馬，對雷神嚟講，係一個小數目，一次賽事已經可以追到數。

　　唔係口臭，之前莫雷拉試過復出抬蛋！一月嘅事咋，唔係好耐，當時可以講得上係「血肉橫飛」，人人唔信邪，以為佢唔會咁失威，點知一出番嚟，即刻整鑊「杰嘢」畀大家嘆，輸到眼癱癱。呢次會唔會歷史重演？好難估啫，以佢今次揸住嗰批兵馬，如果冇頭馬到手，肯定會「杰」過上一次。

　　點解話會「杰」過一月嗰次，佢今次騎9駒，啱啱贏完計有「偉寶之星」、「嫡愛」、「神舟十號」和「盤滿鉢滿」，一個唔好彩，真係食白果，冇隻贏到，呢條數好襟計，最低限度會有幾千萬化為烏有。

　　雷神依家有啲唔同嗰時，目前多咗練馬師關照，人脈好咗，對啲馬了解多咗，識得揀咗，斷唔會喺復出揀批籮底橙出嚟害人啩？！以佢咁正氣形象，講都冇人信，所以，樂觀啲咁諗會好啲，連場搏係必然，睇吓執唔執到三兩場。(Jack)