飛影不容失威

猪拉多纳

　　跑馬先嚟落雨，真係濕滯。如果係谷草仲好啲，起碼唔使諗咁多，一味圍住放頭馬嚟買，已可提高勝算，但係田草就唔能夠咁做，因為地形唔同，直路又長，騎師可以飛出最外檔追趕，當然唔會場場得，成功機會卻比谷草高出好多。

　　第二場四班1000米。「蜜圈」初出即跑同程，輸唔到1個身位得第三，再出轉場倒灶，輸在谷草性能，上次回到直路賽即刻醒神番晒，輸畀隻兩出兩捷「天心星」，都冇說話好講。

　　從兩場上名賽事嚟講，隻馬在四班係超超哋，難得呢場排在外檔，場地乾爽啲，希望跑得快啲，順利打開勝門。

　　第九場三班1000米。「朋友仔」頭一次在港上陣已經好堅，唔怪之得強敵「神舟十號」當前，佢當時賠率只得10倍，唔係冇心出手，只係進度未夠，先至輸少少返嚟，真係敗不足辱。

　　「朋友仔」呢類質新馬跑完一場，可能進度急速起飛，同場又搵唔到強中強那一類對手，贏面自然提高，只要到時唔係熱到兩倍甚至以下，呢匹馬值得買獨頭W。

　　第十場二班1400米。「飛影」初出一役，已經周圍都係「風」，由隔晚至賽日，一直係4、5倍熱門，最終因為閘前煩躁不安被迫退出。

　　賽前勤做工夫

　　「飛影」喺賽前呢3個月內，操練工夫極多，蔡神仙咁樣操法，都係唔想再失威，證明對呢場好有出擊意思。而呢件綵衣都好耐未威過，同主「飛龍」都係擺喺阿蔡，初出輸埋，為公為私，點都要挽回面子，蔡神仙一定「騷哥里」。(陳華棟 資深評馬人)