老虎張牙舞爪撲擊黑貓

猪拉多纳

「老虎」侯城同「黑貓」新特蘭今晚喺英格蘭足總盃8強正面交鋒，雖然話老虎係貓科類動物，但如果貓拍埋去老虎度，絕對係無碇企，齋睇侯城今季聯賽兩殺新特蘭就知啦！侯城未開波已經贏晒個勢，今場波一於捧2.08倍主勝，撐「老虎」時隔84年再入足總盃4強！

查實唔少人都睇淡侯城，皆因兩位1月來投嘅前鋒謝拉域同沙恩朗，都分別為前度球會喺足總盃落過場，即係話依對箭頭今仗都唔合乎上陣資格，加埋翼鋒羅比巴迪做完鼠蹊手術已經提早收咧，意味領隊布魯士只能夠限米煮限飯，靠恩歷克沙保同艾奴高兩個攻堅。
侯城鋒將盃賽生猛

之不過「老虎」就係多得恩歷克沙保喺第5圈（16強）入波，逼和白禮頓獲得重賽機會，跟手就以2:1淘汰呢支「英冠仔」躋身8強。恩歷克沙保難得喺盃賽有機會「騷哥利」，當然要搏老命取悅布魯士，加埋中堅居迪斯戴維斯連續兩場有「士哥」，Yennie覺得侯城嘅火力依然有保證。
新特蘭兩仗失7球

作客嘅新特蘭上星期喺英聯盃決賽有個好開始，上半場對住曼城靠波連尼入波先拔頭籌，奈何下半場連失3球，最後以1:3落敗同錦標擦身而過，對士氣或多或少有影響。

計埋之前喺聯賽大敗畀阿仙奴1:4，「黑貓」近兩仗合共失咗7球咁多，防線嚴重不穩喎！再講，新特蘭今季兩度喺聯賽對住侯城都輸波，上個月喺主場都要吞對手兩蛋，今鋪作客更難寄厚望。