高嶺福星短途發威

猪拉多纳

　　今日係打吡大日子，凡係大賽日，有兩樣嘢一定要注意，第一，盃王大摩梗係會加把勁，對準呢日嚟大舉出兵；第二，熱門實力馬多數唔會玩嘢，所以，今日啲熱門應該唔會太多係地雷。喜歡熱門買得大嘅馬友，今日係重鎚時機。

　　第一場五班1600米。「蜚聲國際」轉去高伯新馬房跑咗一場，成績旺角隔離，新接手仄場先好正常，成敗唔好睇得咁重。

　　蜚聲國際有後着

　　「蜚聲國際」呢次重戴眼罩、除鼻箍，高伯新安排有所變動，似乎經過上場之後，已經摸清楚隻馬底蘊。何況，杜利萊輸完一場未放手，或者係有後着。

　　第四場四班1600米。「天笑」初出用梁家俊，追入第三名，之後強配潘頓，以為會得米，點知名次不進亦不退，兩場都係做三哥。好啦，上次增程至1600米，又一次追人唔到，除咗用失運嚟形容，都唔知講咩好。今次搵到雷神，阿PAUL好少有馬關照佢，但搏極唔贏都冇晒計，唔用到最強兼最紅嘅騎師，好難向幕後人交差，所以，呢場實會搏到甩髀。

　　第六場三班1200米。「高嶺福星」初出唔係唔想郁手，睇吓賽日啲飛就知係咩一回事，奄吓奄吓十倍八倍，最後跑梗頸四，證明唔係冇心搏頭圍。此駒今次由1400米縮至短途，睇隻馬上次末段勁度，跑少二百米有利無害，估計威力將會增強。假如今日啲飛數夠硬淨，唔係愈賣愈冷，反映有收復前失決心，更加要重視。(陳華棟 資深評馬人)