英勇大師實事求是

猪拉多纳

　　跑完打吡，又到谷草大抽獎場合，跑得C欄，預咗條跑道會側埋一邊，但到時係側喺後上馬嗰邊，定係放頭馬嗰邊，一字記之曰，估！所以，想喺谷草搵食真係唔易，除非我哋啲馬迷，叻到好似落飛黨咁，有預知能力，先可以提高勝算。

　　第二場四班1650米。「光速銀桂」前仗贏馬一條龍，上場升班跑輸，由第一名跌落第十名，但又唔怪得晒蔡仔，佢冇乜大錯，只係蠢在唔識隨機應變。

　　光速銀桂配搭似樣

　　「光速銀桂」今次轉到谷草，唔再等田草，唔明點解方仔有呢一着，睇配搭就唔似揸「流攤」，用到莫雷拉，冇理由是是但但，總之，呢場應該會有唔同表現，若然再搏輸，即係代表唔夠班。

　　第三場三班1200米。「國粹精華」時短時長，米高鄭一時幫匹馬報一哩，一時跑吓短途，好似揸唔定主意咁，但內裏唔會冇原因。如果得過且過，杜利萊亦都唔會騎到依家仲係唔捨得。

　　以呢匹馬級數，一哩輸少少畀「喜多盈」，縮至谷中短途，點都有啲班利。

　　第六場三班1200米。問心嗰句，「英勇大師」上場蔡仔錯唔晒，師父畀咗擺前走策騎指示，冇理由唔按本子辦事，如果唔執行，唔通嫌自己五行欠一樣咩！

　　此駒今仗轉用韋達，又由田草返回谷草，告仔實事求是，安排匹馬跑回勝途，再借助韋達騎功及走位，幫助爭取成績。而隔晚隻馬熱到爆，反映補中嘅「風」吹得好勁。（陳華棟 資深評馬人）