櫻花鹿角大騷娛賓

猪拉多纳

科蘭進攻鐵三角爆破力強

大阪櫻花今季引入烏拉圭星級神鋒科蘭，搖身一變成為日職人氣球會，呢位前世界盃金球獎得主剛於亞冠盃開齋，佢同「男神」柿谷曜一朗及南野拓實組成嘅進攻鐵三角好鬼堅，今輪作客同傳統勁旅鹿島鹿角鬥攻，預期士哥多，1.73倍大盤捧得過！

（有線61及201台周日下午2時直播）

科蘭加盟大阪櫻花頭幾場未適應到日職比賽節奏，而且期間又要代表烏拉圭國家隊，搞到呢位老人家有多少疲態。不過，佢上場喺亞冠盃對武里南聯成功於補時階段開齋，助球隊大勝4比0，只要佢腳風順番，相信日職冇乜邊隊後防頂得住。況且櫻花前線仲有柿谷曜一朗同南野拓實輔助科蘭，佢哋三個對武里南聯包辨球隊四個士哥，威力初現，相信嚟緊會愈踢愈好。

鹿島鹿角上周聯賽大炒季初狀態大勇嘅鳥棲砂岩，頭三場聯賽全勝入九球兼保持不失，攻守都掂露霸氣。年輕中場遠藤康大熟大勇可擔大旗，仲有土居聖真及豐川雄太等新星彈起，成班波好有朝氣。

不過，鹿角剛於日聯盃強陣出擊對FC東京輸1比3，後防明顯跌Watt，呢次遇上攻力更強嘅櫻花，相信未必頂得住，估計兩隊會合演一場精彩入球騷。
多摩川打吡大盤咪嫌熱

同日尾場直播上演多摩川打吡，FC東京主場對川崎前鋒，前鋒聯賽仲未開齋，上周更係畀實力麻麻嘅大宮松鼠反勝，佢哋剛於亞冠盃留晒力，今次主將大久保嘉人及雲拿天奴都會落場搏殺，實同對手死過。川崎前鋒近六次作客FC東京五場開大，試過贏7比0，亦曾輸2比4，總之多入波啦，1.59倍大盤咪嫌熱！

（有線61及201台周日晚6時直播）