贏波就封王拜仁-1派禮

猪拉多纳

今晚德甲一哥拜仁慕尼黑作客出戰哈化柏林，依家拜仁領先次席嘅多蒙特足足有23分，而聯賽剩番8輪，若果拜仁今晚順利擊敗哈化，不但喺聯賽連贏19場繼續刷新紀錄，同時亦唔使理另一邊廂多蒙特喺魯爾區打吡對史浩克04嘅任何賽果，提早7輪極速封王，亦會成為德甲史上首支於3月就拎到冠軍嘅球隊，難怪主帥哥迪奧拿落咗必勝柯打。

（有線62及202台周三凌晨３時直播）

其實上輪拜仁作客對緬恩斯，一度咬唔入對手嘅防守嚴密，好在哥帥喺下半場中段換入梳頓沙基利及馬里奧葛斯，即收到奇效，喺賽事尾段連入兩球順利拎3分，今仗面對近４場未贏過嘅哈化勢必獅子搏兔，哈化隨時被佢哋炒鑊甘，一於捧讓球客勝，慶祝「宇宙最強」拜仁衞冕成功。
拍晒心口唔撬達斯拿

另外拜仁一向鍾意向國內勁敵撬人，包括多蒙特羅拔利雲度夫斯基下季自由身加盟，成日畀人話做法低莊，但拜仁主席路明尼加忽然拍晒心口，話唔會收購史浩克天才中場達斯拿，仲話就算「羅拔仔」來投，都唔會逼走文迪蘇傑喎，聽住先喇。