鹿角唔赦傷鋒水手

猪拉多纳

橫濱水手當家射手齋藤學啱啱做老襯，今輪主場對鹿島鹿角一心想整番球「新婚彈」（新婚士哥）賀一賀佢，點知呢位巴打小腿受傷，本周難望披甲，冇埋呢個箭頭，水手實在欠缺破關之法，讓唔起鹿角，呢場推介有1.65倍嘅讓球客勝！
作客對水手有把握

齋藤學剛於周三公布同女伴拉埋天窗，據報佢老婆啲feel好似女星篠原涼子，真係令人羨慕。學仔話自己娶咗老婆後會更有責任感，要努力練波好好發展自己嘅事業，不過，條友落力得滯整親左腳小腿，今場料會缺陣。水手失去王牌前鋒馬昆奴斯後缺少正宗射手，家陣冇埋齋藤學，另一進攻主力藤本淳吾亦上陣成疑，前面惡極有限！

鹿島鹿角上周硬撼大阪櫻花吸引超過三萬人入場創季內新高，可惜最終輸波收場，令粉絲掃興而回。鹿角年輕中場柴崎岳同遠藤康愈來愈成熟，兩條友活力十足，幫老大哥小笠原滿男分擔唔少防務，令佢可專心派牌，球隊攻守平衡做得好，只要能夠改善把握力，有力反客為主，結合佢哋近四次聯賽作客水手未輸過，受讓值得捧場。
有線61及201台周六下午1時直播