國米當黑利禾奴乘機搵着數

猪拉多纳

今晚賽事唔多，不過阿King都搵到好嘢推介，好似今輪意甲壓軸好戲利禾奴主場迎戰國際米蘭，尾三嘅利禾奴可算係國米二隊，因為陣中有多名藍黑軍團小將，適逢國米近排撞邪頭頭碰着黑，佢哋今仗倒戈誓要騷哥利，博回巢後佔一席位，利軍受讓半一梗係捧下盤喇。

（TVB 301周二凌晨3時直播）

利禾奴陣容中，法蘭西斯高巴迪、麥巴耶、艾佛鄧肯、貝科迪爾等全部出自藍黑軍團嘅青訓營，今仗倒戈，呢班生牯仔一定搏甩髀，於國米主帥馬沙利面前爭取表現，希望下季返母會獲得重用，況且位處尾三嘅利禾奴要為護級搶分，戰意唔使懷疑。
烏甸主場打「卡」唔手軟

國米人腳贏幾條街，不過演出飄忽，近兩仗於主場先爆冷輸畀阿特蘭大，上周中又被烏甸尼斯悶和，陣中除咗「辮子前鋒」柏拉斯奧之外冇個靠得住，攻力疲弱下，實在讓唔起搶分心切嘅利禾奴半一咁多，下盤有計！

較早時間開波嘅另一場意甲烏甸尼斯主場對卡坦尼亞，包尾大幡卡坦尼亞不嬲作客腳軟，連對住護級勁敵薩斯索羅都反勝為敗，點頂得住有腳風回順嘅迪拿達利壓陣嘅烏甸呢？主W依絲執。

（TVB 301周二凌晨1時直播）

最後荷乙阿梅爾城主場對精英隊，前者上仗靠球12碼，先贏到近期「逢讓波必輸盤」嘅蠱惑波馬斯特里赫特，「四哥」精英隊為鞏固升班附加賽資格，作客都唔會心軟，小讓平半值博。

（周二凌晨2時開賽）