世界漫遊:李廐馬陣容勁有路捉

不死鸟

噚日提到美國跑完肯塔基打呲後，即時多咗I Want Revenge同「沙漠派對」呢兩匹傷兵，至於日本方面，呢幾日亦有兩匹明星馬加入十字大軍。曾缺陣兩年零四個月，響舊年久休復出兼愈跑愈醒神連掃三項一級大賽嘅「雷神精靈」（Kane Hekili），禮拜二角逐泥地千六米一級賽Kashiwa Kinen時，雖以大熱身分跑第二，但賽後發現左腳骨折，預計要?六至九個月先至可以完全康復。

        練馬師角居勝彥話會畀「雷神精靈」留響馬房休息一個星期，之後就會運去北海道安平町嘅牧場休養，換句話講，呢匹馬最快要年底先復出。

        講番今日沙田十場泥草混合賽，李廐馬大軍壓境，不妨集中火力吼實佢嘅馬，其中出戰第三場四班千四米嘅「心路」，上仗同程初配韋紀力跑第二，呢次換上柏寶捲土重來，力足收服失地。

        第四場「皇龍飛駒」贏過泥地千二米，第六場「勵盈」連仗走勢山雨欲來，續配小將減磅出擊，兩駒均值得兼顧。