唔使理作客Buy仁啦!

猪拉多纳

今晚歐聯上演兩場8強首回合，先講拜仁慕尼黑作客鬥曼聯，拜仁可以話係現時歐洲氣勢最強、踢法最全面兼最具娛樂性嘅球隊，強如皇家馬德里、巴塞隆拿對住佢哋都冇優勢，更何況今非昔比嘅紅魔鬼！曼聯目前問題多多，除咗戰術問題、信心不足之外，球員踢落都冇乜鬥心，似乎唔多願意替莫耶斯賣命，度士實在睇唔到曼聯有咩板斧可以守住來勢洶洶嘅拜仁。拜仁已經提早奪得聯賽錦標，餘下球季時間可以專心踢好歐聯，相信今場唔需要考慮主場或作客，技高一籌嘅拜仁絕對有力先拔頭籌。
巴塞踢大戰特別有計

反而另一場巴塞隆拿主場鬥馬德里體育會，因為兩軍同樣來自西甲已經熟晒路，彼此實力又非常接近，所以主場因素隨時成為勝負關鍵。巴塞早前接連不敵皇家蘇斯達及華拉度列，一度被踢落聯賽榜第三位，好彩之後擊敗宿敵皇家馬德里信心返晒嚟，表現亦重上正軌，而且亦再次證明呢班波踢大戰特別有計。馬體會今季成績令人喜出望外，但講到質素逐個秤始終唔及巴塞，今場度士都係向有主場之利嘅巴塞投下信心一票！