阿德爭阿二「雄心」萬丈

猪拉多纳

布里斯班獅吼已經鎖定澳職常規賽冠軍，但為咗爭取有利位置殺入季後賽，打落幾隊波都要搏命，就好似仲有望爭做「阿二」嘅阿德萊德聯今日會同墨爾本雄心對壘，「阿德」係澳職主場「入球王」，以甘巴爾嘅「巴塞Style」，今鋪實攻到作客例牌腳軟嘅雄心甩轆都似，一於捧2.8倍「讓主」。

（有線64及203周五下午4:30直播）

出身自巴塞嘅甘巴爾，昔日執教傑志時已經將佢嘅「地上最強」地面推進戰術發揚光大，去到澳職繼續照辦煮碗，亦因為佢套進攻戰術好睇又好食，搞到雄心都想來季撬佢過檔執教，今鋪對住「未來飯碗」，當然要施展渾身解數做番齣好戲啦！
甘巴爾鬥「未來飯碗」做好戲

「阿德」近期連贏FC悉尼同威靈頓鳳凰，最重要係佢哋主場出擊夠晒惡，12戰錄7勝3和2負總共轟入27球，主場火力係澳職之冠，以摩拉利斯紐曼夥拍沙治奧施里奧合組嘅攻擊箭頭火力十足。

反觀雄心近4場聯賽全部失分，今季聯賽作客12戰只贏得1場咁大把，加上球隊近8次喺聯賽鬥「阿德」只曾1勝，近況、往績同實力都輸成截，今鋪想唔輸大鑊都難啦！