賀芬咸強勢反轉哈化

猪拉多纳

士氣如虹 拜仁都和到

Alwin居住喺賀芬咸大本營Sinsheim多年，太太亦喺賀芬咸球場內精品店工作，絕對係流住Hoffens血，睇見球隊近期咁爭氣，真係開心到暈，今晚賀芬咸作客首都球隊哈化柏林，哈化向來係我哋嘅剋星，不過現時嘅賀芬咸已經成為小拜仁，不斷突破自己嘅極限，有信心今晚可以打破宿命，哈化柏林讓平半，Alwin推介下盤。

（有線61及64台周日晚11時30分直播）

哈化同賀芬咸過去7度交鋒，哈化取得4勝2和佳績，我哋只曾試過喺2010年2月作客贏過2比0，不過今時今日，雙方狀態各走極端，喺上半季表現出色嘅哈化柏林，歇冬後完全跌Watt，近11輪聯賽只攞得8分，加埋入得9球，係下半季德甲入波最少嘅球隊。

呢班波一向依賴箭頭阿祖安拉莫斯入波，當呢位哥倫比亞射手腳風唔順時，佢哋就變成冇牙老虎，不過哈化嘅致命傷係防線大哥盧斯頓貝加因傷長抖，呢位瑞士國腳今季保持64%單對單對抗勝出率，係哈化眾球員之冠，哈化今季頭19輪賽事，有佢在陣嘅情況下，每場平均攞到1.5分，但下半季佢不幸提早收咧，結果哈化近9場比賽平均得分降到得番0.9分，上仗不敵史浩克04錄得4連敗，狀態跌至谷底。
羅拔圖法明奴留低振軍心

另一邊廂，賀芬咸近3戰狂搶7分，每場波都有3球進帳，包括上輪作客同外星戰隊拜仁打和3比3，成為今季唯一一支成功喺安聯球場攞到分嘅球隊，球會上下同球迷都接受咗教練基斯度嘅瘋狂進攻理念，賀芬咸至今28場聯賽已經產生咗125個入球，佢哋嘅比賽可以話絕無冷場。

球隊近期接到嘅最好消息，光芒四射嘅22歲羅拔圖法明奴意外咁同球會續約到2017年，呢位巴西中場受到多家大球會青睞，利物浦領隊羅渣士更公開表明想季尾收購佢，連賀芬咸班主霍普都話過好難留人，但佢最終都畀教練基斯度打動留低。目前賀芬咸士氣如虹，目標瞄準聯賽榜第七位嘅來屆歐霸盃入場券，今晚作客都有權照攻照贏。