「泥碼」我大把 四班晒你冷

猪拉多纳

今季四班泥地賽徐雨石擺晒風水陣，左青龍有「喜利高」、右白虎擺埋「嶺峯」，長追徐廐四班泥馬WP呢條攤路絕對有利可圖，而講到最吸金嘅財星位，就肯定喺「偉寶之星」，佢每逢揸住「泥碼」坐埋1至5檔靚位，四次晒冷三次有錢收，周日又卜定1檔勢成馬迷明燈，大家等睇表演喇！
       
偉寶之星曾在四班泥地千二米輕勝，本錢雄厚。

季內練馬師泥地成績，新開倉的蘇偉賢暫以7W居首，徐雨石5場頭馬只列第三，但若單計佔比重最多的四班泥賽，石哥可說是一枝獨秀，此倉5場泥地頭馬全在此班次取得，分別為「大衛金剛」、「四喜滿堂」、「嶺峯」、「偉寶之星」及「喜利高」，另亦摘下2亞3季，而且當中三甲馬分頭不俗，進取一點長捧徐廐四班泥地單W有逾倍半純利，若穩陣WP一併兼投，現時亦有近9成回報（見附表），四班泥賽徐廐真係好多籌碼，次次都揀隻狀態最好嘅出動，馬迷買得安心。
       
徐雨石
偉寶之星單天保至尊

今次賽事有共有三場泥地賽，其中兩場為四班，徐雨石在此旺門班次只派出「偉寶之星」登場，出爭第三場泥地短途，此匹四歲馬每逢排到內檔就醒神，四戰共得冠亞季殿各一，次次有遮擋留得舒服都撲上嚟，是次莫雷拉雖然唔騎，但用到發揮後勁馬唔錯的梁家俊分多幾蚊，買WP啱晒數。再畀多項數據大家參考，近十匹泥地四班大熱門執6勝2位，勝出率六成、上名率則有八成，臨場若見到「偉寶之星」賠率「眨眨吓」，畀多啲信心捧落去喇！