快快贏唞夠實搏

猪拉多纳

　　第三場第四班1200泥地，「世界都市」上仗改攻泥地，演出卻與試閘不符，起步已經唔算快，只好急急腳趕上前競跑，惟末段卻敗得潰不成軍，你可以認為是敗於耗力過多擺前走，但其實牠於外叠跟前跑，反而將食沙風險減至最低。再者，巫斯義全程力策，惟馬兒末段仍然墮退，發揮無問題但表現卻乏善可陳，看來馬兒進度上出了問題。

　　當然，我也知道「世界都市」留住追乃是過往獲得好表現的跑法，但馬兒在馬林中食沙，亦有可能產生抗拒，不可將落敗全歸咎於跑法問題。今次容廐出王牌安排牠再跑泥地賽，意識上是有不服氣之感，但想同做始終是兩回事，欠缺足夠證明下，唔博W。

　　至於「行星」外地唯一勝仗是膠沙直路賽1000米，賽事水準如何，我不知曉，但上仗出爭田草1400米雖得第九，但加眼罩有點急又大慢閘，結果也有不俗追勢，今鋪縮程跑泥地，我寧願博牠！至於談到揸Q膽博W馬，應非「快快贏」莫屬，泥地1200米乃是死路程，之前有得揀都唔跑泥地，如今一搏開便不再轉程，回足氣再跑，只要前段搶得出，便已叫胡了。(馬會賽事 首席評述員)