勁酒王變出生機

猪拉多纳

　　今日好多位騎師都騎十場八場，都唔只雷神、潘頓。而有呢種情況出現，大家就要提高警覺，唔好淨係睇住雷潘韋安呢4位仁兄，仲有大把騎得鬥得之人，好似柏寶、田泰安已經係其中兩位，所以，度馬時盡量令到自己心水清。

　　第七場四班1200米。呢場馬危機處處，「赤壁武士」唔係冇高質，班手足曾經話過，只要進度理想，遲早二班見，問題係未熟，但係賠率熱辣辣，先至會打其他馬主意。

　　「勁酒王」都唔知衰邊瓣，成日輸，熱又死火，冷又唔掂，證明係本身有問題，呢次配件、路程、騎師及班次唔同晒，話唔埋有新轉機，冷冷哋諗得過。

　　第九場三班1600米。「陽明星星」上次末段衝落唔多，唔多關韋達或隻馬嘅事，亦唔認為係狀態有起落，因為臨場行圈時，隻馬仲係鬼火咁靚。

　　米高鄭嘗試幫呢匹馬戴番眼罩，務求以最少嘅改動，刺激到隻馬，手法合理而穩陣，事實上，去季笠個眼罩上去，嘩，嗰場贏條街返嚟，如果真係起到作用，邊有對手係佢嗰皮。

　　第十場三班1200米。「一馬當先」又係另一出動配件嘅正面例子，上次初戴眼罩，即刻變身超級馬，真係全程跑來一馬當先！贏到對手連食塵嘅機會都冇。

　　一馬當先無懼升班

　　依照「一馬當先」上次贏馬嗰種犀利法，四上三班，閒過立秋，重磅都唔使怕，只係賠率太熱，未必啱大眾口味。

    （陳華棟 資深評馬人）