銀河白帽射手大駁火

猪拉多纳

新一季美職已經踢咗大約個半月，深為香港球迷熟悉嘅洛杉磯銀河開季表現唔錯，星級射手羅比堅尼更係狀態大勇，上場喺主場一腳射死溫哥華白帽，明早作客再戰白帽，輸得勁唔抵嘅白帽有老將前鋒堅尼米拿復任正選，誓要同羅比堅尼一較高下，今場科娜揀大盤！

溫哥華白帽同洛杉磯銀河兩周內連對兩次，銀河喺主場先拔頭籌，靠住曾喺英超打滾多年嘅星級射手羅比堅尼於下半場接應隊友右路傳中撞入致勝一球，可見「羅比仔」雖然依家已經33歲，變成「羅比佬」，但級數仍在，近期狀態托弗，近三仗場場都有波入，銀河成功靠佢氣走溫哥華白帽。

對手有個羅比堅尼，白帽都有個「堅尼」，34歲嘅堅尼米拿雖然名氣冇羅比堅尼咁大，不過佢都喺英超狼隊踢出名堂，夠晒級數踢美職，上場後備上陣皆因主帥卡爾羅賓遜想畀佢抖吓，今場料會復任正選。其實白帽上場即使冇派堅尼米拿正選上陣，表現都好過銀河多多聲，今仗返到主場再戰銀河誓要報仇，對攻下大盤值得捧場。

（TVB 302周日早上7時直播）