兵工廠擸齊架生打「老虎」

猪拉多纳

加強保安禁球員偷食

英超今晚爆發「足總盃冠軍前哨戰」，由侯城主場迎戰阿仙奴。齋睇牌面「兵工廠」已經秤先幾條街，會方更加對症下藥，賽前加重保安唔畀球員偷食，加埋奧斯爾同法米尼都會喺今仗復出，搏老命幫球隊保住個前4席位，鬥心同人腳都勝「老虎」一籌，Yennie梗係捧1.7倍「客勝」啦！

兩隊波下個月中會喺溫布萊爭足總盃錦標，今晚就先嚟場預演，雖然阿仙奴「秉承」近季虎頭蛇尾本色，但球隊依然要為來屆歐聯入場券努力，Yennie收到風，知道阿仙奴為杜絕球員喺客場旅途帶女返房胡天胡帝，已經下令加強保安喺深夜進行巡邏，嘜實以基奧特為首嘅「衰仔兵團」，開波前冇得再搞搞震，場上表現自然會好轉啦！

奧斯爾 法米尼復出

阿仙奴最近喜事接二連三，繼砌低韋根躋身足總盃決賽後，養傷多時嘅奧斯爾亦可以喺今晚候命，加埋防中法米尼刑滿復出，「兵工廠」攻守兩瓣實力都大大增強。最重要係「雙基」普多斯基同基奧特上場對韋斯咸大發神威，兩人合共為球隊射入3球，狀態Fit成咁，今晚造訪侯城隨時又數胡。

主場嘅侯城上場聯賽以1:0險勝史雲斯，護級壓力唔算太大，相信會方將會視下個月場足總盃決賽為目標，但領隊布魯士未打先認輸，佢承認球隊唔夠阿仙奴踢，又話足總盃冠軍都係非阿仙奴莫屬，連大佬都咁講，班球員又點會有信心贏波呀？
侯城雙箭頭冇料

再講，一對前鋒組合謝拉域同沙恩朗最近齊齊啞火，當中沙恩朗已經連續3場聯賽冇波入，今晚有主場之利都唔似會偷到阿仙奴雞。