恒大重「手」晒冷爭首名

猪拉多纳

亞冠盃G組出現4隊同積7分嘅離奇景象，今日兩場小組收爐戰等同決賽，上屆冠軍廣州恒大（足智彩FC廣州）雖然主場打和橫濱水手亦可晉級，但係為免次名出線，响16強碰到韓職硬嘢浦項制鐵，恒大決意「晒冷」全力爭勝，2倍「讓球主勝」博得過！

（中央5台、廣東體育周二晚7:00直播）
老闆賽前設宴打氣

G組兩場波唔使講一定係主場嘅全北、恒大贏面比較大，不過喺落手投X之前，先要搞清楚個積分形勢先，因為如果齋睇足智彩個積分表，恒大只係排第3位和都隨時瓜得，但係根據亞洲足協經過兩次調整嘅積分表，恒大其實憑對賽勝負同得失球數，升番上小組第1，今晚和波都至少次名出線。

查實亞洲足協最初公布嘅積分排名，都同足智彩完全唔同，全北係第1，恒大第2，直到《新華社》發文質疑恒大對全北一場贏3:1，一場輸0:1，大家同分又係淨勝球1球，點解恒大排第2？亞協先至「撥亂反正」。

我哋冇必要理係咪球圈政治角力造成咁嘅混亂，從投X角度諗，亞協應該都唔想恒大出事。事實上，恒大為咗呢場生死戰準備得好足，上場中超對申花佢哋收起唔少主力，老板許家印賽前仲專門設宴幫班球員打氣，連宣傳海報都用「晒冷」做主題，打瓜水手嘅決心好大。

無疑橫濱水手有中村俊輔、齋藤學呢啲日本猛人，上場聯賽對柏雷素爾亦都刻意留力，搞到0:0收場。但係恒大向來主場打日本仔都有一手，迪亞文迪又可以復出，只係得鄭智傷患問題比較大，今晚強陣出擊天河，贏水手兩球並唔係奢望。