筍盤益你：亞洲橙王再下一城

不死鸟

連埋周三晚在內，今季跑馬地賽事只得番六次，相信練馬師自然會爭分奪秒，盡量為旗下特擅窄場嘅馬爭取贏馬機會。好似霍利時馬房呢次六匹參戰馬中，大部分實力唔曳兼曾喺谷草有表現，尤其動用王牌報名嘅「亞洲橙王」、「神鑽福將」剛啱喺谷草贏馬，今次兩駒均報爭勝途，擺明有添食之意。

　　唔少處女馬經常被捧成熱門，除咗有啲係幕後過分高估外，馬迷亦會覺得呢類馬未交代，鬥志一層唔使懷疑，而「亞洲橙王」就係其一例，來港三季，結果跑到上仗第二十七戰先開齋，但歷來所得嘅一冠三亞兩季都喺跑馬地取得，而近兩仗跑谷草千二米亦非冠即亞，看來呢匹五歲馬應已完全適應水土外，明顯亦獨沽一味特擅谷草賽事。

上仗贏馬姿態輕鬆

　　前仗「亞洲橙王」排一檔出戰谷草千二米，由於有檔利兼配韋達，臨場被捧成大熱絕對可理解，結果輸畀大超班馬「八運寶」個幾馬位跑第二，表現已及格有餘，但再出同程排十檔，喺谷草其實差唔多未跑先輸咁滯，但居然又被捧成大熱，足證台前幕後信心爆棚，最終彈甩今次又同場嘅「鋼意」個幾位馬位初開勝門，姿態咁輕鬆又真係估佢唔到。

　　既然上仗排十檔都贏，加上呢次對手熟口熟面，估計「亞洲橙王」就算冇咗韋達之助亦唔驚，今戰霍廐強陣出擊，相信呢匹馬一定會配合搏殺，不妨WP捧場。

　　今晚英超紐卡素喺主場對米杜士堡，換咗平時呢類戲碼絕對唔吸引，但今仗邊隊輸波就大有機會降班，生死關頭宜從實力方面埋手。目前兩隊同得三十一分，主隊得失球數字較佳排第十八，聯賽連埋今仗得番三輪，相信雙方亦唔願意打和各得一分，估計呢場會大打進攻足球，務求全取三分護級。 

　　如計近況，唔使講都知兩隊一定輸多贏少，而紐卡素同米杜士堡居然連續三場冇入波，呢次會唔會齊齊有心冇力悶和收場﹖但呢場主客和嘅和波初盤係今晚六場波中最冷一場，似乎馬會睇好會分出勝負，既然米杜士堡近六次作客聖占士公園球場只得兩和四負曳績，一於揀主客和主勝。