計得精明：風之子試準搏殺

不死鸟

沒有韋達的日子，大家都以為群龍無首，勢成亂局，上周六賽果卻是異常正路，當日賽事熱門馬成績可以話係近年季尾最正路一次，而最大受惠者當然係柏寶，近期手風大順且坐騎實力因韋達缺陣而大為增強，短兵相接壓線一刻亦盡顯功架，近期佳作「蓮華生輝」跑到一絕險勝，跑多步已不敵「帝聖龍駒」，「實在好」則剛好相反，步步輸一步贏，在終點線前趕上壓倒「紅噹噹」，而巧合地兩場賽事都係壓倒蔡明紹，小將始終未夠火候。

　　要成為一流騎師需要時間磨練，質新馬當然亦要時間成長，才能踏入收成期，周三晚列陣第三班一千米的「風之子」，來港時只得兩歲，首仗上陣觀感偏瘦，顯然未完全長成，去年十二月上陣跑泥地千二全程跟跑而回，可謂遠離水準。

大幅增磅好現象

      「風之子」上仗久休近五個月再戰，體重比去年重四十磅，年稚馬大幅增磅係好現象，骨架亦比初出時大了半個碼，結果改跑田草千二米貼欄跟前走，跑來有板有眼，最後二百米更一度出頭，試馬味甚濃，有了上仗經驗，改爭谷草縮程跑一千必定有計，負磅超輕之下，隨時可殺對手一個措手不及。