信利多斂口開齋

猪拉多纳

　　今個賽日除了一級賽女皇盃，還有本地二級賽短途錦標，戲碼本來十足，奈何近日天氣欠穩，不時有雨，場地一旦有變，就大煞風景了，望屆時天公造美。

　　說到女皇盃的出賽馬，我一直有留意牠們操練狀況。「神威啟示」快試時出正腳完成，去勢好勁，是最討我歡喜的外隊馬；「再自由」亦是日本代表，但我覺得好普通，草地快跳一課，至終點前150米已轉錯腳，不夠利落；「神聖衛士」踱步已覺輕身，草地快跳亦貫注集中，不俗；「民族英雄」戰績彪炳，但試跑又不起眼！

　　至於港隊方面，上仗同是遠征杜拜的「軍事出擊」和「多名利」中，我鍾意「多名利」，我唔覺得牠有疲態，首度復課單跳識出正腳，更是罕有。「同個世界」夠弗，但照計唔夠跑！而「威爾頓」剛硬拼完打吡大賽，幸有足夠回氣期，起初試1000草閘不太搶眼，但認真省一省，接着的拍跳簡直有元神歸位之感，所以摩廐馬中，我最睇好「威爾頓」！不過，有匹進步到得人驚的「信利多」在陣，計表現不下於「威爾頓」，倘非上賽欠2000米路程經驗，戰局有權改寫，如今口勁收斂有力反先。(馬會賽事 首席評述員)