師醒徒謙，精彩！

猪拉多纳

關乎本季英超冠軍寶座誰屬之戰，「紅藍決戰」今晚上演，球迷非看不可！榜首利物浦聯賽11連勝，的確犀利，紅軍今季英超戰績彪炳，唔多唔少因為毋須兼顧歐洲賽，而本土盃賽亦一早出局，可專注聯賽。美國籍老闆約翰亨利經營運動產業亦有一手，往往可以將旗下球隊點石成金，帶來今時今日嘅成功。
羅帥深明「兵家大忌」

今仗榜首大戰其中一個焦點，肯定係雙方領隊師徒交鋒，羅渣士係莫連奴嘅昔日高徒，因此賽前言論好謙虛，向對方狂笠高帽，大讚車仔係富豪球會，有充裕人腳應付雙線作戰。驕傲自滿係兵家大忌，即使利物浦領先優勢明顯，羅渣士仍保持低調謙卑，實在抵讚。

莫連奴亦如平時一貫頭腦清醒，車路士喺佢領軍下，甚少犯腦筋上嘅錯誤而輸波。「寸王」現時首要目標始終係爭取打入歐聯決賽，近日亦事先張揚，話同球會高層商討後，今仗會收起部分主將，留力周中歐聯對馬德里體育會。一早講明出副選，可避免一旦今場英超輸波受質疑，鋪定晒後路，的確高招。
金句：紅藍師徒鬥法，賽前各有講法