呢仗至係下半場！

猪拉多纳

皇家馬德里首回合明知同拜仁慕尼黑鬥攻，未必可以保持控球在腳，主帥安察洛堤用番充滿意大利文化嘅穩守突擊周旋，結果以1比0擊敗拜仁。事實上，唔少球迷都唔了解，高價球星要佢哋喺一兩場賽事參與多啲防守，係唔會有問題，佢哋會好樂意咁做。
哥帥應變陣用「查馬」打防中

Peter認為拜仁今晚要平反敗局，主帥哥迪奧拿一定要變陣。首先係要用拿姆打右後衞，查維馬天尼斯打防中，呢個陣可以令拿姆同洛賓喺右邊配合，當洛賓攞住個波扣入中間時，會令右面出現「康莊大道」，拿姆就能夠作疊瓦式助攻。而湯馬士梅拿嘅後上攻門，加埋馬里奧葛斯既可射門又可扭波入楔，自然令對手後防出現唔少空位，可以令拜仁製造更多攻門機會。不過，最重要係要用如日方中嘅查維馬天尼斯打防守中場，因為佢可以喺阻截對手攻勢後迅速轉守為攻，加上佢有身材，喺死球時可以製造干擾畀皇馬。

拜仁同皇馬大前提係唔好失第一球，Peter預期上半場會係膠着狀態，如果皇馬下半場仍揸住一球優勢，拜仁未能改變局勢就會變陣採用全攻型踢法。皇馬後防只要守得穩，要再一次晉級唔係出奇事，今仗先係兩強相遇嘅下半場，上半場落後一球並唔係一件糟糕嘅事情。
金句：有肥安任教，皇馬點會唔識守