甘美奧大反擊搵到食

猪拉多纳

聽朝繼續有南美自由盃玩，16強首回合落後1粒嘅甘美奧，將會返到主場擺大個頭，準備上演絕地反擊爭入8強，撞正講明冇心龜縮嘅聖羅倫素，2.5倍大梗係抵玩啦！

（開賽時間：周四早上9:00）
聖羅倫素講明鬥攻

呢個「巴阿」對碰備受注目，據巴西《環球報》透露，截止尋日為止，呢場自由盃16強次回合大戰已經賣出8成波飛，預計今場波肯定爆棚。首回合作客輸0:1嘅甘美奧，賽前仲收到好消息，就係老將薛羅拔圖同攻擊中場雲達爾拿斯文圖傷愈可候命，主帥摩利拉喺賽前練習賽更試驗排出巴高斯、艾華頓同杜度3箭頭掛帥，聽朝擺明要瘋狂進襲。

甘美奧足球總監雷爾哥斯達仲話，隨住上場聯賽砌低明尼路，球隊已經重新贏番球迷嘅信任，佢有信心今仗會獲得更多Fans支持，既然係咁，甘美奧為球迷同8強資格，唔加多兩錢肉緊點掂？

至於總比數領先緊嘅聖羅倫素，你以為佢會龜縮咩？又唔係喎！由於連首回合養傷嘅鋒將白蘭迪都好番，佢哋個主帥巴沙尋日話無意改變戰術，會沿用首回合11位正選兼進取踢法撼甘美奧，雙方都肯攻，點會大唔起吖！