紅魔獵黑貓駁火「大」廝殺

猪拉多纳

群「魔」無首嘅曼聯今晚英超會喺主場迎戰「黑貓」新特蘭，尋日英國傳媒言之鑿鑿話，荷蘭國家隊領隊雲戈爾已經同曼聯簽約兩年，下周就會落實做新「魔頭」。放風話想走嘅傑斯，依家做看守領隊首仗表現唔錯，又要為歐霸盃入場券努力，不過新特蘭亦要為護級而戰，相信兩隊今晚一定搶攻，預料上演一場入球騷，1.46倍「入球大」咪嫌熱！

曼聯上場聯賽喺奧脫福以4:0大炒諾域治，重現「魔性」喪攻對手，令一眾球迷感受到久違嘅霸氣。賽前消息話荷蘭射手尹佩斯「咁啱」喺莫耶斯被炒後傷愈，今晚有望復出掛帥，相信會令曼聯火力再提升，曼聯依家爭第6位嘅熱刺6分但踢少場，爭奪歐霸盃資格仲有價講，今場肯定狂攻爭勝啦。雖然朗尼未必出得，「波士」傑斯尋日又無情情話自己可能離開効力27年嘅曼聯，但係對呢場波嘅勝負應該冇乜影響。
傳雲戈爾OK傑斯話想走

作客嘅新特蘭最近狀態回勇，近兩場聯賽都贏晒，先喺史丹福橋球場擊敗車路士，打破「寸王」莫連奴主場不敗身，上場喺護級大戰又大炒卡迪夫城4蛋，護級形勢好轉。球隊主力射手域咸及波連尼最近狀態弗到漏，前者近3場比賽有5球進帳，「黑貓」為咗留喺英超相信會搏命搶攻，入球一定唔會少。