副會長插手搞亂AC國米受讓有「餐士」

猪拉多纳

AC米蘭上輪聯賽不敵羅馬之後，意大利傳媒大爆副會長加利安尼捉咗教練施多夫「照肺」，要求佢今輪意甲喺聖西路上演、鬥國際米蘭嘅「米蘭打吡」作出唔少調動。踢踢吓突然轉打法，AC戰力相信會大打折扣，國米受讓一於撐1.55倍嘅「讓客」！

（TVB301周一凌晨2:45直播）
施多夫遭照肺焗變陣

AC上場作客0:2輸畀羅馬，由意甲第6位跌到落第10，雖然仲有機會爭到下屆歐霸盃入場券，但嚟緊嘅聯賽已經再冇失分空間。據了解，加利安尼最近同施多夫餐敍，名義上話係食飯，實則就係「照肺」，加利安尼「建議」施帥排出雙箭頭陣式，由巴洛迪利同柏仙尼攻堅，又話本田圭佑啱啱傷好，唔應該畀佢打正選，高層建議係好事，不過臨時變陣打亂晒部署，AC想踢出應有水準都幾難。

對手國米近期雖然只係得2勝4和，但始終都算係不敗，而且6戰當中有3場係保持清白之身。今場佢哋除咗祖安古靴美呢位長期傷員外，冇咩其他傷停問題，AC對住齊腳嘅國米想入波都唔係易，所以呢個「讓客」試得過！