皇馬當弗[-2]照擒蝙蝠

猪拉多纳

闖歐聯決賽 士氣無與「倫」比

清脆擊敗德國王者拜仁殺入歐聯決賽嘅皇馬，球員士氣爆晒燈，今晚重返西甲搏殺，主場遇上喺歐霸盃慘被補時入波淘汰，陣中瀰漫一片愁雲慘霧嘅「蝙蝠兵團」華倫西亞，[-2]都唔成問題，照捧1.87倍「讓主」。

（now632台周一凌晨3:00直播）
歐霸盃出局 華倫未回魂

皇馬最近諗住幫沙比阿朗素打甩上周中歐聯嗰張黃牌，等佢能夠喺決賽披甲，不過唔少西班牙傳媒都話機會唔大。點都好，相信教頭安察洛堤都會做好準備，繼續喺西甲力追「一哥」馬體會嘅同時，亦會趁機考察「沙比替身」伊拿拉文迪、卡斯米路同埋艾斯高嘅表現，試問爭上位嘅佢哋落到場點會唔搶韁？

雖則喺歐聯搏殺完嘅C朗同加里夫巴利未必踢足，但無論佢哋踢幾耐，甚至收起唔用都好，都唔使擔心開唔到「讓主」，事關相比皇馬勇闖歐聯決賽士氣高昂，今戰對手華倫西亞情況剛好相反，佢哋早幾日喺歐霸盃補時階段慘失作客入球出局，同決賽緣慳一面，士氣直插谷底。「蝙蝠兵團」教頭比斯雖然公開話為球員同球迷表現覺得驕傲，會長阿馬迪奧沙禾更加喺操練期間現身安慰球員，但睇見中堅列卡度高斯達喺賽後翌日受訪時忍唔住喊出嚟，就知道班球員仲未收拾到心情，咁樣邊夠皇馬撼呀？