世界漫遊:重量級評分仍未止步

不死鸟

  英國權威賽馬機構《態況》，早幾日公布全球評分最高二十駒名單，排頭位係三月底以晨操姿態捧走杜拜免稅店盃、依家成為高多芬藍衣軍團嘅「神勇鬥士」，評分高達132分。澳洲就有七駒上榜，排名最高係馬王「週末商販」，評129分排併頭第六位，有長青樹之稱嘅短途怪傑「兼併目標」評128分排併頭第十一位。其餘五匹上榜嘅澳洲馬分別係「阿帕奇貓」、「龐貝尊主」、Scenic Blast同「拼合」，同樣評126分排榜尾。

        現年九歲嘅「兼併目標」已再次踏上環球之旅，早幾日聯同「龐貝尊主」、Sarrera飛往新加坡，出席五月十七日星期日響克蘭芝馬場舉行嘅國際賽事，到時呢匹上屆KrisFlyer國際短途錦標冠軍，將會回配老拍檔福達進行衛冕。

        今晚谷草八場夜賽，採用最狹窄嘅C加三欄C加六彎角逐，加上季尾效應，前領馬估計可以佔一面倒優勢。列陣第六場三班千二嘅「衝勁寶」，呢匹八歲老馬仲有兩腳，今次好彩抽到一檔靚位，只要早段畀佢霸住條欄，其他馬唔係咁易過到佢。

        角逐第七場三班一千米馬拉華度賽馬會盃嘅「永得勝」，季內一再輸近，評分減至依家嘅六十一分已找到支持位，快馬抽得五檔好位，進可攻退可守，只待幸運之神眷顧，頭馬應可手到拿來。

       「重量級」季內連捷連升仍未止步，新一代谷草王響現時評分仲未遇到阻力，有力食尾胡。