紅運飛駒咪灰心

猪拉多纳

　　今晚8場谷草賽事，冇咗雷神，潘頓同韋達之爭？有冇咁單純呀！阿棟唔係想大家將事情複雜化，但要問問自己，會唔會咁正路呢？如果多場出現單打獨鬥鏡頭，或者你1場、我1場，輪流嚟贏，太陽可能由西邊升起，總之小心啦。

　　第二場四班1200米。「紅運飛駒」跑3場，冇場有P，輸到怕怕，阿蔡冇理由咁失威，如果隻馬唔係有啲料，倒不如轉跑泥地碰碰運氣，佢肯堅持跑谷草，應該係有見地。

　　其實「紅運飛駒」上次初跑谷草表現唔係差，希望跑完多做工夫，可以有多少進步，有機會打破悶局。

　　紅簿仔擺明車馬

　　第四場四班1650米。「紅簿仔」之前喺四班跑得誇啦啦，上番三班即刻跑到連前五名都冇，實力問題冇得勉強。呢次一有機會落班，嗱嗱臨跑番谷草，連近期騎開嘅何澤堯都唔用，搵潘頓操刀，方仔心意點，怕且唔使我多講。而呢匹馬之前可在此程力撼「勝算高」，實力在此場唔會唔夠贏，係時候取得來港後首場勝利。

　　第五場三班1200米。回看「遊俠兒」之前贏馬嗰場，蹄下敗將計有「寶貝王」、「確威龍」、「新力飛」、「萬事盛」等駒，呢場頭馬真係幾堅，冇理由三班會留得住呢匹馬。

　　難得輸完兩場，潘頓係都唔放手，證明佢都未絕望，如果唔係睇得起隻馬，連輸兩場仲唔走頭咩！所以，鬥志肯定好到加零一，希望屆時賠率唔好太熱，有多少水位博吓。(陳華棟 資深評馬人)