世界漫遊:為跑大賽各出奇謀

不死鸟

 現今馬圈經常強調公平競技，不過當發生利益衝突嗰陣，唔少人都會為咗鞏固自己利益而不擇手段，而今屆美國三冠馬王大賽已完成頭關肯塔基打吡，但場內、場外烽煙四起，真係好睇過戲。

        日前提過新晉馬后Rachel Alexandra易主後，幕後有意空降出戰次關必利是錦標，但上手馬主先前冇替佢報名跑三冠賽，所以能唔能夠入選，仲要睇其他邊線入圍馬嘅意向。響肯塔基打吡一鳴驚人嘅Mine That Bird，馬主Mark Allen早兩日居然聯絡Pioneerof the Nile馬主Ahmed Zayat，希望雙方各自出多一匹已報名參加三冠系列嘅廐侶，將出賽馬數目湊夠十四匹，合法地將Rachel Alexandra擯出必利是錦標嘅正選名單。

        Rachel Alexandra新主人亦唔係善男信女，收到消息後立即請嚟美國馬會主席菲柏斯游說Ahmed Zayat，力陳為咗馬圈形象及體育精神，希望佢拒絕呢個奸計。最重要係響呢個關鍵時刻，擁有Mine That Bird生父Birdstone、響當地極具分量嘅Mary-Lou Whitney亦話放棄本身利益，挺身力撐Rachel Alexandra。呢位女強人講明拒絕做出任何損害馬圈聲譽嘅事，就算名下有馬匹夠資格優先出戰必利是，但如果Rachel Alexandra因為咁而冇得跑，佢寧願退出。既然唔少勢力人士撐到出面，睇怕Rachel Alexandra九成可以如願爭逐必利是錦標。