哥狂牛大開薩戒

猪拉多纳

「迪哥」復出搵魚腩磨刀

「一哥狂牛」撞散薩爾瓦多！今晚熱身賽西班牙會喺華盛頓面對「超級魚腩」薩爾瓦多，雖然「狂牛兵團」嘅世盃名單已經塵埃落定，不過唔好以為咁樣班球員就會Hea住踢呀，皆因西班牙正選競爭激烈，迪亞高哥斯達更傷愈有望復出，強陣出擊，讓到3球都撐2.4倍「讓主」。

（now632台及TVB13周日凌晨4:00直播）
「迪哥」愈操愈弗通拉莫斯坑渠

「狂牛兵團」喺國際足協最新公布嘅世界排名中仍然穩守「一哥」之位，今次面對世界排名68嘅薩爾瓦多，當然冇有怕啦！仲有呀，已經復操嘅前鋒迪亞高哥斯達早排操練時畀人影到輕鬆通沙治奧拉莫斯坑渠，證明狀態愈嚟愈弗，領隊迪保斯基仲講明：「迪亞高哥斯達會喺比賽中接受考察，希望有令人滿意嘅表現。」
薩爾瓦多慘敗美國1:5

雖然迪亞高哥斯達未必踢正選，但韋拿同費托為咗唔好咁易畀「迪哥」搶位，今場對「魚腩」當然要入多幾粒去到盡。薩爾瓦多近8場國際賽，只試過喺美洲金盃贏過海地，就連對住實力稍遜嘅美國都被大炒五個一皮，對住西班牙更加冇可能逃過「吞蛋」宿命啦！

西班牙《阿斯報》早前爆料，話國家隊今屆獎金勁和味，入決賽已穩袋36萬歐元，如果贏冠軍嘅每人足足袋成72萬歐元，比上屆世盃嘅60萬上升咗足足20%。「花紅」多成咁，莫講話班球員一定會搏到盡，就算想Hea，班教練團見錢開眼，又點會畀班球員偷懶先，雖然家陣只係熱身賽，但全軍肯定士氣高昂，務求大勝一場以最佳狀態強戰世盃。