高盧雞試新陣 「加」多兩錢肉緊

猪拉多纳

冇咗列貝利嘅法國，今晚會喺里爾進行決賽周前最後一場熱身賽，咪以為對手係世界排名低佢哋64位嘅牙買加，「高盧雞」就會Hea踢，事關領隊迪甘斯正正需要靠今場波試陣，搵出失去列貝利後嘅最佳攻擊組合，牙買加防線肯定大難臨頭，熱捧1.47倍「讓主」。

（now714台周一凌晨3:00直播）
牙買加派仔出戰

因為私人恩怨唔揀拿斯尼，加上列貝利同加連尼亞因傷緣盡世界盃，主帥迪甘斯冇晒派牌球員使，今屆世盃都咪話唔頭痕。據《隊報》所講，獲補選入伍嘅雷米卡比拿同舒尼達連極其量只會戥腳，取代列貝利踢正選嘅球員，好有可能係基沙文。呢位皇蘇左翼又快又扭得，有佢聯同華布拿為單箭頭基奧特提供彈藥，火力堅勁。

對手牙買加今仗派年輕球員擔正，呢班人唔係喺本土搵食就係喺英格蘭低組別聯賽角逐，實力去到邊大家心照。最大鑊係効力諾域治嘅射手路薩仲因為護照問題未能隨軍添，造訪法國又點會唔輸鑊勁吖！