比利時名氣贏成條街

猪拉多纳

今日出條問題考吓大家，講明先，答中無獎！今屆世界盃32隊，邊隊嘅球員平均年紀係最細呢？3、2、1，夠鐘開估：答案係比利時！佢哋平均年齡係25歲241日，比起加納球員平均年紀細4日。
阿爾及利亞出產過施丹

雖然比利時過往喺世界盃成績唔係好突出，最叻都係1986年拎第四名。不過論球員名氣，佢哋就勁過今晚對手阿爾及利亞好多嘞，因為就咁隨口數都有高柏尼、華美倫、費蘭尼、雲拜頓、奇雲迪布尼、盧卡古同夏薩特等。隊中超過10人効力英超球會，所以踢起上嚟真係個個都熟口熟面。

相反，要你講一個阿爾及利亞球員都真係有啲難度。不過，呢個國家又唔係完全同球星拉唔上關係，原來球王施丹嘅爸爸媽咪都係阿爾及利亞人，之後佢哋移民咗去法國，所以施丹先至代表法國國家隊。

再睇近況，阿爾及利亞近十場賽事，只係輸一場，睇近況好似好勁咁，但小心留意，對賽球隊都係斯洛文尼亞、羅馬尼亞同阿美尼亞呢啲二線國家隊，如果覺得呢場佢哋可以贏或和，會唔會大膽咗少少呢？所以，我自己都正路咁睇好比利時高一線，話晒班球員大賽經驗一定多過阿爾及利亞，所以識揀嘅話，一定揀比利時大炒阿爾及利亞。