唔該美斯畀多啲愛心

猪拉多纳

無獎問答遊戲第二輪：請問今屆世界盃邊支球隊球員平均年齡係最大呢？登登登登……答案就係阿根廷啦！平均年齡係28歲零336日，比排第二嘅洪都拉斯年紀大128日。其實平均年齡達28歲以上嘅球隊，一共有8隊，仲有主辦國巴西、西班牙、伊朗、希臘、葡萄牙同厄瓜多爾。

阿根廷雖然上場贏波斯尼亞2比1，但係有唔少人賽後都覺得美斯揸流攤，似乎未盡全力。不過，美斯又點止一個Talking point，場波完咗之後，網上即刻瘋傳佢無視小球僮伸出友誼之手條片，事緣係賽前當球員喺通道準備時，有個矮細嘅小球僮想同美斯握手，點知美斯無理佢，反而同其他3名球證握手，小球僮惟有失望走開。
漠視小球僮網民鬧爆

之後美斯再返轉頭，嗰位球僮已經離開咗，最後美斯都有同其他球僮握手，搞到唔少網民都話美斯呢個球王無愛心。唔知當時美斯係咪愁緊8年世界盃嘅入球荒，一時之間魂不附體，所以先睇唔到個小朋友。不過今晚對住伊朗，應該可以輕鬆贏波，所以唔好再發雞盲忽略其他人喇。至於另一場德國對加納，加納經驗有限，大賽未能發揮得最好，撞啱今場對住有經驗、攻守兼備嘅德國，好難有運行，日耳曼兵團只要Keep住上場大炒葡萄牙嗰股氣勢，相信呢組首名出線應該無問題嘅。