尹戈爾Show Time！

猪拉多纳

防線唔掂要化腐朽為神奇

今晚兩場8強大戰，阿根廷撼比利時繼續靠美斯一個人孭飛。鬥哥斯達黎加嘅荷蘭叫做好啲，有尹佩斯同洛賓兩把尖刀外，仲有後備殺手亨特拉爾數胡，不過「橙軍」後防計時炸彈唔知幾時爆，會唔會前面入埋唔夠輸，就要考考主帥尹戈爾功力喇！

荷蘭教頭尹戈爾係醒嘅，上場輸緊1粒畀墨西哥時夠膽換走尹佩斯，亨特拉爾亦不負所託助攻史奈達扳平，補時頂住壓力入埋極刑，係荷蘭反勝嘅功臣，今場隨時又做雷霆救兵。不過橙軍正副隊長正受其他問題困擾，尹佩斯喺記招發老脾，之後同古華特棄足用手打沙灘網球減壓。洛賓涉嫌插水繼續被人大做文章，希望唔會影響到佢哋嘅發揮啦！
比利時把握力差

「橙軍」中場硬漢尼祖迪莊因傷提早玩完，戴利白蘭特又唔掂，反而古積特老而彌堅助攻助守，最大鑊嘅係後防幾個計時炸彈唔知幾時爆，上場改用華希亞治一樣穿窿，真係要自求多福嘞！對手哥斯達黎加殺入8強已經超額完成，上場佢哋要主攻希臘反而唔知點算好，踢到加時射埋12碼體力消耗大，相信門將基羅拿華斯今場會好唔得閒。

另一邊阿根廷、比利時上場都激戰到加時先險勝晉級，體能上大家都無着數，把握力分野係勝負關鍵。美斯實在勁到冇朋友，即使每場波都被嚴密看管，但守衞走漏佢一次就有能力將機會轉化成助攻甚至入波。可惜嘅係一班隊友唔爭氣，喺呢個時候真係好懷念「野獸」泰維斯！對手比利時後備大把人用，但佢哋上場36次攻門入得兩球，埋門始終差啲火候，再冇改善嘅話，今場可能要付出沉重代價。