曼城訪肯薩斯做「大」Show

猪拉多纳

英超美職冠軍對決

美職冠軍鬥英超冠軍，呢場拍跳夠晒睇頭喇啩！曼城正式展開美國之旅，聽朝會造訪肯薩斯體育會，為國際冠軍盃備戰。「藍月亮」季前熱身賽毫無霸氣，缺少高柏尼同赫特嘅防線根本信唔過，對住開行Turbo兼氣勢如虹嘅肯薩斯體育會，相信係一場大手交易，捧1.63倍大啱數。（now621台周四早上9:00直播）
世盃戰將未歸隊 藍月亮防線穿窿

曼城下周一會喺國際冠軍盃登場，首戰硬撼AC米蘭，大軍尋日抵達堪薩斯國際機場，拿斯尼一亮相就對住當地傳媒扮鬼臉，又主動同Fans簽名影相，心情靚到爆。不過主帥比歷連尼應該冇乜Mood喇，事關尼格度日前對赫斯一戰右腳跖骨骨折，起碼要抖成3個月，對「藍月亮」梗係大件事啦！

一眾世盃戰將好似赫特、高柏尼、耶耶托尼同阿古路等，將喺禮拜四先同球隊會合，今仗都唔使預佢哋。睇番「藍月亮」近兩仗熱身賽嘅表現，分別淨吞登地兩蛋，跟住就險勝赫斯2:1，狀態明顯未操起，以身形發晒福嘅米卡李察士同攻強過守嘅高拉洛夫領銜防線，睇見都心寒啦！
肯薩斯體育會氣勢勁

美職踢到如火如荼，論作戰狀態，肯薩斯體育會班人肯定好過曼城多多聲，會方尋日宣布同兩位美國國腳，包括守將馬特比斯拿及中場格拉咸素斯續長約。佢哋上場聯賽又憑費爾夏柏射入靚罰球砌低洛杉磯銀河，終止後者長達兩個月嘅不敗身，全隊上下都氣勢如虹。肯薩斯體育會有Form，曼城條防線係唔掂，但以祖維迪掛帥嘅鋒線勝在有質素，照計呢場波唔慌少波入。