迪科爾倒戈熱刺「大」報復

猪拉多纳

射手迪科爾上季不獲熱刺重用，今年初黯然遠走FC多倫多，交易仲包埋雙方約定喺聽朝踢場熱身賽，由熱刺作客FC多倫多。倒戈嘅迪科爾當然想趁機入波向舊主示威，但多倫多防守又唔掂，咁嘅情形梗係捧1.5倍入球大。

（now621台周四早上7:00直播）
多倫多豆腐防線

迪科爾轉戰美職並唔係去歎世界，上陣15場取得12個入球同3次助攻，早前仲入選美職明星隊喺下個月鬥拜仁，今仗誓成熱刺心腹大患。佢坦言同舊東家交手感覺古怪，但就唔會留力：「我踢咗熱刺咁多年，大把老友仲喺嗰度，我好期待同佢哋交手。」不過多倫多防線唔穩陣，隊長史提芬卡達維、守衞馬克布隆、積臣漢歷基又傷埋，就連主帥賴恩尼爾遜都話頭痕。

熱刺上場對西雅圖海灣者失守3次，防線都靠唔住，難怪盛傳佢哋會簽入史雲斯左閘賓戴維斯加強防守。不過經過上場波，艾朗連儂同安祖斯唐辛等鋒將上力，足以撕破多倫多近6場失10球嘅豆腐後防。