紅牛 阿仙奴Hea踢歎「細」界

猪拉多纳

亨利倒戈、「兵工廠」25年嚟首度登陸美國……聽朝紐約紅牛主場熱身賽鬥阿仙奴大把焦點，但你話場波好激咩？紅牛教練柏基賽前表明會勒住主力嘅落場時間，阿仙奴領隊雲格亦只係帶1個正箭頭出征，玩2.6倍細，定過抬炸彈啦！

（now621台周日清晨5:00直播）
德國3「兵」開咧戰缺陣

今場波嘅主角，唔使問都知係亨利，職業生涯為阿仙奴轟入228球嘅佢，堪稱「兵工廠」傳奇，加上阿仙奴25年嚟首次嚟到「花旗國」，所以今仗波飛晨早賣晒。之不過，美職踢到如火如荼，紅牛教練柏基坦承班球員殘殘哋，4日後佢哋仲要喺聯賽鬥皇家鹽湖城，佢賽前已講明唔會畀班主力踢得耐。

紅牛勒住，咁阿仙奴呢？雖然話艾朗藍斯、阿歷士阿伯倫、辛迪卡索拉同韋舒亞都有份去美國，但新兵阿歷斯山齊士同埋德國3寶奧斯爾、普多斯基、梅迪薩卡仲放緊假，雲格尋日記招仲證實德國3寶要8月11號先歸隊，亦即社區盾對曼城之後一日，距離英超首輪主場迎戰水晶宮只有5日，操都未操過，肯定趕唔切喺首輪披甲。禾確特因傷冇隨隊，耶耶辛洛高神秘落選，即係話阿仙奴只得年僅18歲嘅艾卡邦1件正箭頭，咁嘅鋒線邊信得過呀？