杜塞爾多夫 頭炮可克敵

猪拉多纳

德乙今晚正式開鑼，由杜塞爾多夫打頭陣，主場迎戰上季德甲包尾大幡布倫瑞克。布倫瑞克今季雖然有教練拿碧拿治繼續留低，不過唔少主力已經離隊他投，實力大打折扣，就算受讓平半都不宜睇好，一於撐杜塞爾多夫1.8倍上盤。

（有線18、64及203周六凌晨2:30直播）
布倫瑞克主力流失嚴重

杜塞爾多夫上季排德乙第6，今季誓要再次挑戰升班席位。佢哋由上季曾短暫領軍嘅奧利華歷克擔正，呢位新帥亦針對弱點買人加強實力，正式簽入上季借將神射手賓斯卓普、前漢諾威中場沙治奧賓度等人，務求改善鋒力。再者，杜塞爾多夫未開鑼已Fit到漏，6場熱身賽取得5勝1和，對手包括韋根、莫斯科火車頭等球隊，的確唔講得笑，佢哋梗會食住呢股氣勢喺主場打響頭炮振軍心。

另邊廂嘅布倫瑞克，喺德甲踢咗1季後又做番升降機重返乙組。雖然主帥拿碧拿治留隊有助穩定軍心，之不過首席射手甘比拿、正選門將丹尼爾達華利同埋波斯尼亞國腳比卡斯錫全部走晒，話唔影響班波季初表現都冇人信啦，作客想搶分真係唔容易！