兵工廠大騷賓至如歸

猪拉多纳

酋長盃開打鬥攻冧球迷

酋長盃開打，意味英超好快又開鑼。阿仙奴今晚喺酋長盃主場招呼賓菲加，玩入球大着數。雖然兵工廠明顯未上力，但佢哋有智利「突破狂人」阿歷斯山齊士登場，賽前A山喺Instagram上載自己嘅阿仙奴17號波衫新相，擺明已經預備好搏殺，信A山就一於玩大佢啦！

（TVB301周六晚11:20直播）

雖則話阿仙奴已經連續兩年失落酋長盃冠軍，但佢哋身為主人家，輸贏都唔可以悶親球迷。事實上，對上4屆兵工廠踢8場有6場開入球大，由於中堅梅迪薩卡未歸隊，隊長華美倫傳聞即將離隊被雪藏，今場阿仙奴想守都未必守得到，要省招牌惟有擺大個頭啦！
A山登場爭表現賓菲加天殘地缺

事實上，兵工廠大部分中前場球員已經歸隊，射手基奧特都有份去奧地利集訓，主力係得前鋒普多斯基同中場奧斯爾仲放緊假，新加盟嘅翼鋒阿歷斯山齊士又喺Instagram鋪相預告登場，其他「廠仔」知道今季正選位置競爭激烈點敢唔搏？

另邊廂嘅賓菲加，有前鋒洛迪高利馬、安祖高美斯、翼鋒拿沙馬高域同中堅加雷離隊，睇見佢哋熱身賽嘅表現都幾大鑊，買入曼聯翼鋒碧比更加令人唔知佢哋想點！好在賓菲加一向嘅作風都唔係死守，既然阿仙奴主場實攻，佢哋要執番一兩粒幫手開大唔難嘅！