利物浦大難臨頭

猪拉多纳

識攻唔識守 難頂多蒙特

利迷最期待嘅畫面出現了，馬高列奧斯終於嚟利物浦喇！不過呢位靚仔球星其實係跟埋多蒙特過嚟利物浦踢友賽，「紅軍」返到嚟晏菲路球場迎戰「蜜蜂軍團」，兩軍都係攻強於守嘅球隊，行軍迅速，今晚誓必合演一場入球騷﹗

（亞視本港台周日晚7時15分直播）

失去蘇亞雷斯後，雖然利物浦買咗成村球員返嚟，包括列基林拔、拉爾拉拿、拿沙馬高域、安利簡恩等，但眾多新兵都唔係Big Name（大牌球星），個個利迷都想「紅軍」買番一位能夠頂替阿蘇嘅Big Name，其中好波得嚟又超級靚仔嘅多蒙特中場靈魂馬高列奧斯就係利迷嘅幻想對象。算啦，各位利迷唔好發夢喇，今場專心力撐愛隊好過啦，況且馬高列奧斯今晚都因傷冇得出！

「紅軍」依家陣中雖然冇Big Name，不過就有潛力極高嘅小將，喺阿蘇走咗、史杜列治受傷之時，呢幾場熱身賽睇到「紅軍」進攻靠晒史達寧同菲臘比古天奴呢兩隻老鼠仔，都一樣好有威脅。問題係利物浦嘅防守好唔掂，始終「紅軍」依家嘅主攻踢法往往會搞到自己後防空虛，再加上領隊羅渣士識教進攻但唔識教防守，最弊係右閘位仍然焗住要搵毒瘤格連莊臣踢，新兵查維文基路冇咁快出得住，上場國際冠軍盃決賽對曼聯正正就係輸喺格連莊臣身上，畀艾舒利楊格狂爆落底出波，真係睇到利迷眼火爆！

今場利物浦對住擅長快攻同全場壓迫嘅多蒙特，防線真係好難頂得住，「蜜蜂軍團」經過幾場熱身賽後狀態返晒嚟，近六場有四場入三球或以上，攻力超強，新兵恩莫比尼亦已融入隊波踢法，大盤有買趁早。
史特加可挫侯城

同晚另一場英、德熱身賽，史特加主場鬥侯城，侯城兩日前剛戰罷歐霸盃，體力料未回復十足，史特加熱身賽場場有波入，主場可睇高一線。

（TVB 301周日晚10時直播）