傳統3強大執位 波圖添猛將威畀里睇

猪拉多纳

隨住上周賓菲加互射12碼挫里奧艾維奪葡超盃，亦象徵新一季葡超揭開序幕，不過傳統三強此消彼長隨時大執位。上季聯賽盟主賓菲加嚴重失血，洛迪高摩連奴、安素佩雷斯、奧斯卡卡度素、加雷、奧巴拉克等主力全部走人，最慘係只補入好似曼聯棄卒碧比之流嘅奀星及一些年輕球員，成隊冇晒上季三料冠軍嘅威勢。
賓菲加星散 士砵亭爆內訌

另一支里斯本球隊士砵亭雖留住前線猛將費迪蒙迪路及施利文尼，但年輕守將艾歷迪亞回流英倫，於世盃一鳴驚人嘅阿根廷左閘馬高斯盧祖日前更罷操博走人，已被罰首輪聯賽冇份踢，加上要兼顧歐聯，想保住亞軍難上加難。

相反，上季失意嘅波圖一改以往狂賣主力賺錢政策，保留大部分骨幹，仲罕有豪花二千幾萬歐元，簽下馬田斯恩迪、巴謙美及阿祖安盧比斯。由於新帥洛佩特吉執過西班牙U21，今夏從皇馬、巴塞同馬體會三大西甲豪門，借得潛力無限嘅卡斯米路、基斯甸泰路及奧利華托利斯，配合原有嘅積臣馬天尼斯及祖安昆特路，質素冠絕葡超。雖然波圖於下周中有歐聯後顧，但喺今晚揭幕戰主場對住馬里迪莫，贏兩粒濕濕碎，讓球主勝咪錯過。

(有線155台周六凌晨3時直播)