葡超開鑼戰波圖殺迪

猪拉多纳

歐洲各地聯賽陸續重燃戰火，今晚輪到葡超揭開戰幔，波圖喺地頭火龍球場恭候馬里迪莫。中堅新星文加拉雖然轉投曼城，但佢哋今夏擴軍成功，「西甲鐵三角」嘅表現更令人期待，開鑼戰對住失去唯一進攻泉源嘅馬里迪莫，揀1.57倍「讓主」！

（有線155周六凌晨3:00直播）

波圖喺今夏轉會市場相當積極，一早搞掂喺世盃踢得醒神嘅荷蘭國腳馬田斯恩迪，之後又喺馬體會買入右翼阿祖安盧比斯，借用巴塞左翼基斯甸泰路同皇馬防中卡斯米羅，組成攻守兼備嘅「西甲鐵三角」，配合積臣馬天尼斯喺前線數胡，鋒力超強。

對家馬里迪莫就陰功咯，首席射手達利迪亞斯被賓菲加撬走後，雖然喪買4件箭頭補充，不過慕沙馬素上季喺甘馬雷斯嘅入波一隻手數得晒，艾加哥斯達同迪耶高蘇沙之前仲喺葡甲打滾，最後嗰件伊賓奴更加失咗業成年，旨意佢哋入波聽乞米啦！