鳥棲冇晒氣「細」

猪拉多纳

呢期日職至頂癮球隊鳥棲砂岩，今日傍晚主場迎戰FC東京，今場波係鳥棲易帥後第二擊，點睇都唔似可以維持主場強勢，都係博1.68倍入球細着數啲。

排榜首嘅鳥棲，無情情喺上星期大戰廣島三箭前同功勳教練尹晶煥解約，真係令人莫名其妙。至好笑係新任監督吉田惠接手第一擊，對手就係佢嘅前東家廣島，結果鳥棲輸咗0:1。

鳥棲輸畀廣島，已經畀浦和追至同分，今日對住東京唔贏就可能坐歪，但係佢哋過去主場6戰對手，只得1勝1和4負，吉田喺呢啲大戰唔手忙腳亂就假。好彩係東京幾個射手平山相太、干卡維斯、武藤嘉紀以至河野廣貴，都係主場至識入波嘅門口狗，咁嘅環境不如博吓入球細。