紅軍靚陣上力 打殘修咸頓

猪拉多纳

今晚英超早場，利物浦會喺晏菲路迎戰修咸頓，「紅軍」今夏雖然放走上季踢到曉飛嘅蘇亞雷斯，但淨係「咬人蘇」筆轉會費都夠利物浦執番靚個陣，包括一口氣簽入拉爾拉拿、列基林拔同洛夫雲3個「聖人」，最打得嗰3件走晒，修咸頓仲邊惡得出樣吖？「紅軍」喺季前熱身賽已經展現創造力同活力大大增強，上周大炒多蒙特場波更加係代表作，今晚對住天殘地缺嘅「聖人」，1.82倍「讓主」有買趁早！

（now621台周日晚8:30直播）

蘇亞雷斯離隊後，唔少球迷都戥「紅軍」火力擔心，但隨住佢哋喺國冠盃殺入決賽，加上啱啱熱身賽大炒「蜜蜂兵團」4蛋，相信大家嘅憂慮已經一掃而空。前鋒史杜列治季前賽Fit爆，由菲臘比古天奴、史達寧同隊長謝拉特從後支援，「史獨」肯定唔愁冇供應。

最重要係列基林拔熟晒舊東家路，今晚如果有機會落場隨時又係一大殺着，就算新兵拉爾拉拿同拿沙馬高域受傷缺陣，「紅軍」都夠晒本錢做低「聖人」。
「拆骨」聖人增兵九唔搭八

睇小修咸頓，皆因佢哋新季散晒，除咗已經過檔「紅軍」嘅三子外，就連左閘勞基梳爾都去埋曼聯，最頂癮係新帥朗奴高文明明大把彈藥補充兵力，居然買個門將費沙科士打返嚟，認真九唔搭八。其餘新兵好似杜辛泰迪治，賴恩貝特蘭同施列迪泰達亦只係二打六角色，一時間難以彌補球隊嘅實力，朗奴高文英超「地標戰」相信唔會有Happy Ending。