波圖平手盤益「里」

猪拉多纳

開季即撻着 射手On Fire

馬賽對波圖大家睇厭未呀？今晚歐聯附加賽首回合里爾對波圖，有直播有聲有畫捱眼瞓都要睇啦！雖然里爾開季表現唔曳，但波圖慣性一撻即着，對上4季嘅頭8場比場，只係輸過畀巴塞隆拿，射手積臣馬天尼斯又已經着咗火，波圖平手抵捧喎！

（有線61及201周四凌晨2:45直播）

里爾今季陣容變動唔大，前鋒奧歷治被出售到利物浦後，最後都以借用身份留隊，而且仲有巴斯蒂亞前鋒基安尼般奴、曼城中場馬高斯盧比斯同索察後衞哥捷亞加盟，睇佢哋開季後連續4場不敗，兼且連續4場開入球細就知踢得幾穩陣。
里爾穩陣波開季4連細

對手波圖今季由西班牙U21教練洛佩特吉帶領，所以掃入唔少西班牙球員。最受注目有馬德里體育會前鋒阿祖安盧比斯、巴塞翼鋒基斯甸泰路同羅馬左閘荷西安祖，就算前鋒迪科亞、中場費蘭度法蘭斯高斯同中堅文加拉離隊，牌面依然好強。

或者大家會擔心，波圖換教練又換血，好易出事，但其實佢哋季初表現特醒，對上4季嘅頭8場比賽，只係輸過1場，仲要係11年喺歐超盃以0:2不敵巴塞，證明備戰工作做到足，射手積臣馬天尼斯開咧戰有波入已證明一切，何況後衞阿歷士辛度傷愈，抵捧啦！